Article Published in Maharashtra Times ठाणे + कोकण Mar 31, 2014, 12.45AM IST आनंदवनसाठी ठाणेकरांची मदतीची गुढी म. टा. वृत्तसेवा, ठाणे बाबा आमटे आणि त्यांच्या कुटुंबीयांनी कुष्ठरोगी आणि आदिवासींसाठी निर्माण केलेल्या आनंदवनाची आणि त्यांच्या कार्याची ठाणेकरांना ओळख व्हावी या उद्देशाने ठाण्यातील आनंदवनस्नेही मंडळ कार्यरत आहे. आमटे परिवाराच्या या उज्ज्वल कार्यासाठी ठाणेकरांनीही मदतीचा हात पुढे केला असून, दहा वर्षांत ठाणेकरांनी आनंदवनसाठी ८१ लाखांची मदतरुपी गुढी उभारली आहे. आनंदवन, लोकबिरादरी, हेमलकसा, सोमनाथ अशा १५ - १६ प्रकल्पांच्या माध्यमातून आज आमटेंची तिसरी पिढी कार्य करत आहे. बाबा आमटे यांनी घेतलेला समाजकार्याचा हा वसा जपण्याची जबाबदारी केवळ आमटे कुटुंबीयांची नाही तर ती माणुसकी जपणाऱ्या प्रत्येकाची आहे. या उद्दात्त भावनेने २००३ मध्ये भाऊ नानिवडेकर, सत्यजीत आणि गीता शहा, रंजना कुलकर्णी, स्वाती आगटे, शरद भाटे यांनी आनंदवन स्नेही मंडळाची स्थापना केली. तेव्हापासून दरवर्षी फूल ना फुलाची पाकळी म्हणून ठाणेकर या प्रकल्पांसाठी मदत देत आहेत. आनंदवनातल्या मुलांनी, अपंगांनी तयार केलेल्या शुभेच्छा पत्रांची विक्री, आनंदवनावर आधारीत पुस्तकांची विक्री करणे, आमटे कुटुंबीयांची व्याख्याने आयोजित करून निधी गोळा करण्यासाठी आनंदवन स्नेही मंडळाचे १०० कार्यकर्ते धडपडत असतो, असे सत्यजीत शहा यांनी सांगितले. २००९- १० मध्ये ६ लाख ६३ हजार ५७४, २०१०- ११ मध्ये १३ लाख २१ हजार ५७६, २०११- १२ मध्ये ३२ लाख ९२ लाख ८१३, २०१२- १३ मध्ये ५ लाख३२ हजार ८६० आणि २०१३ पासून आतापर्यंत ९ लाख ७३ हजार ८२८ रूपयांची मदत ठाणेकरांनी आनंदवन स्नेही मंडळाच्या माध्यमातून आनंदवन व लोकबिरादरी प्रकल्पासाठी केली आहे. हवेत मदतीचे हात आनंदवन स्नेही मंडळाने लोकबिरादरी आणि आनंदवन प्रकल्पांची माहिती देण्यासाठी http://anandwansnehimandalthane.blogspot.in/ ही वेबसाइटही सुरू केली आहे. लोकबिरादरी प्रकल्पात सध्या हॉस्पिटल उभारणीचे काम सुरू आहे. त्यासाठी ठाणेकरांकडून ५ लाखांची मदत देण्याचे आश्वासन मंडळाने दिले आहे. यासाठी मदतीच्या हातांची गरज आहे, ज्यांना शक्य असेल, त्यांनी सत्यजीत शहा यांना ९८२११५०८५८ या क्रमांकावर संपर्क साधावा असे आवाहन आहे.
No comments:
Post a Comment